Йӗпреҫ районӗнче вӑрмана кайсан ҫухалнӑ арҫынна шыраҫҫӗ. Ун пирки авӑн уйӑхӗн 9-мӗшӗнченпе хыпар ҫук.
Туҫа ялӗн ҫынни, Еремеев Николай Петрович, ҫав кун вӑрмана кайнӑ та киле таврӑнман. Ун чухне вӑл хаки тӗслӗ камуфляж комбинезон, атӑ тӑхӑннӑ пулнӑ. Хӑй 170 сантиметр ҫӳллӗш, вӑтам кӗлеткеллӗ, ҫӳҫӗ ҫырӑ, кӑштах шуралнӑ.
Ун пирки мӗн те пулин пӗлсен ҫак номерсемпе шӑнкӑравламалла: 8(800)700-54-52 е 112. «Лиза Алерт» инфоргӗ Екатерина (Кирейчик), 89777084704.
Йӗпреҫ районӗнчи Чӑваш Тимеш ялӗнче пурӑнакан арҫын хӑй кайса ҫӳрекен хӗрарӑмӑн ывӑлне хӗнесе пурӑннӑ.
46 ҫулти арҫынна халӗ РФ Пуҫиле кодексӗн 117-мӗш статйин 2-мӗш пайӗн «г» пункчӗпе килӗшӳллӗн явап тыттарнӑ.
Хӑй кайса ҫӳрекен хӗрарӑмӑн 16 ҫулти ывӑлне ҫав арҫын юратман. Ҫавна май вӑл ӑна 2022 ҫулхи чӳк уйӑхӗнчен пуҫласа кӑҫалхи ҫу уйӑхӗччен пӗрре ҫеҫ мар хӗненӗ.
Суд арҫынна 3 ҫул та 2 уйӑхлӑха тӗрмене хупмасӑр ирӗкрен хӑтарма, сӑнаса тӑмалли вӑхӑта ҫулталӑк тесе йышӑннӑ.
«Пулаҫҫӗ вӗт тӗнчере ҫакӑн пек пултаруллӑ та ӗҫчен хӗрсем: пӑрчӑкан пек вӑр-вар, чӗкеҫ пек чӗвӗлти, кӑввик кӑвакарчӑн пек кӑмӑллӑ!» Ҫакӑн пек ырласа ҫырнӑ Марина Карягина тележурналист халӑх тетелӗсенчен пӗринчи хӑйӗн страницинче. «Хальхинче Дина Трякова ал ӗҫ маҫтӑрӗ пирки-ха сӑмахӑм», — тенӗ вӑл.
Йӗреҫ районӗнчи Пучинке хӗрӗ Дагестанра иртнӗ халӑх пултарулӑхӗн фестивалӗнче ӗҫтешӗсемпе пӗрле Чӑваш Ен культурипе паллаштарнӑ. Марина Карягина унран илнӗ интервью «Россия 1» каналпа эфира тухӗ.
Чӑваш Енре шкул автобусӗсене тӗрӗслӗҫ.
Республикӑн прокуратуринче пӗлтернӗ тӑрӑх, ҫӗнӗ вӗренӳ ҫулӗ умӗн вӗсене патшалӑхӑн ҫул-йӗр инспекцийӗпе пӗрле тӗрӗслеме тытӑннӑ-ха. Ҫав вӑхӑтра кӑлтӑксем тупӑнкаланӑ.
Сӑмахран, Куславкка районӗнче шкул автобусӗсем вӑхӑтра техосмотр тухман иккен. Ҫӗрпӳ районӗнчи темиҫе автобусӑн «ГЛОНАСС» навигаципе информаци тытӑмӗ ӗҫлемен. Йӗпреҫ, Пӑрачкав тата Комсомольски районӗсенче автоубссенче огнетушительсем тата аптечкӑсем пулман.
Республикӑра чи лайӑх вӑрман инспекторне суйланӑ. Кӑҫал ку ята Йӗпреҫ вӑрманӗнӗн лесничийӗ Александр Кондратьев тивӗҫнӗ.
Вӑл чи малтан вӑрман мастерӗ пулнӑ, паянхи кун та ҫак тытӑмрах тӑрӑшать – вӑрманти пушар хӑрушсӑрлӑхӗшӗн яваплӑ. Инспектор пушар хӑрушсӑрлӑхӗ пирки ҫынсемпе те калаҫу иртерет. Лайӑх ӗҫленӗшӗн ӑна РФ Хӳтӗлев министерствин Хисеп грамотипе чысланӑ.
Кунсӑр пуҫне Александр Кондратьев – виҫӗ ача ашшӗ. Аслӑ ывӑлӗ Чӑваш патшалӑх аграри университетӗнче вӗренет, пуласлӑхне ашшӗ пек вӑрманпа ҫыхӑнтарма ӗметленет. Вӑтамми – шкула, кӗҫӗн хӗрӗ ача пахчине ҫӳреҫҫӗ. Пушӑ вӑхӑтра ҫемье вӑрмана кӑмпана тата ҫырлана кайма юратать.
Йӗпреҫ районӗнче «Мелодия древних народов» (чӑв. Авалхи халӑхсен кӗвви-ҫемми) фольклор фестивалӗ иртнӗ.
Унта хутшӑнакансем Йӗпреҫри уҫӑ вырӑнти этнографи музейӗнче пуҫтарӑннӑ. Вӗсем пысӑк вӑйӑ катне тӑрса тухнӑ, «Ҫивӗтсене ҫивӗтлесси» ятлӑ чӑваш халӑх вӑййине вылянӑ.
«Фестиваль хаваслӑ иртрӗ. Вӑл ӑшӑлӑхпа, тӑван тӑрӑхпа культурӑна юратни сисӗнсе тӑчӗ», — тесе палӑртнӑ район администрацийӗнче.
Йӗпреҫ районӗнчи 63 ҫулти арҫын биржӑра инвестор пек ӗҫлесе тупӑш тӑвас тенӗ те… 1 миллион ытла тенкӗсӗр тӑрса юлнӑ.
Ун патне мессенджера инвестици платформи ҫинче укҫа ӗҫлесе илме пулать тесе хыпар килнӗ. Ку утӑ уйӑхӗн вӗҫӗнчех пулнӑ. Кӗҫех ун патне палламан ҫын шӑнкӑравланӑ та укҫа-тенке пысӑк процентпа проекта хывма ӳкӗте кӗртнӗ. Ҫапла арҫын уйӑх тӑршшӗпе ултавҫӑсене 1 миллион ытла тенкӗ куҫарса панӑ. 800 пин тенки – кредит илнӗскер. Укҫа-тенке каялла кӑларма тӑрсан «инвесторсем» каллех укҫа хывма ыйтма пуҫласан тин арҫын хӑй ултавҫӑсене аллине лекнине ӑнланнӑ.
Кун тӗлӗшпе пуҫиле ӗҫ пуҫарнӑ.
Вырсарникун, ҫурла уйӑхӗн 13-мӗшӗнче, 14 сехет ҫурӑра Йӗпреҫ районӗнчи Шуркасси ҫывӑхӗнчи уй-хирте ACROS 530 комбайн ҫунма тытӑннӑ. Вӑл – 2011 ҫулта туса кӑларнӑскер.
Комбайн вырӑнти агрофирмӑн пулнӑ. Уйра тырӑ вырма тухнӑскер тӑрук ҫунма пуҫланӑ. Ӑна икӗ пушар техники сӳнтернӗ.
Халӗ комбайн мӗншӗн ҫунма пуҫланине тата инкек мӗн чухлӗ тӑкак кӳнине шутлаҫҫӗ.
Иртсе кайнӑ канмалли кунсенче пирӗн республикӑри патшалӑхӑн ҫул-йӗр хӑрушсӑрлӑхӗн автоинспекторӗсем 63 ӳсӗр водителе тытса чарнӑ.
«Нетрезвый водитель» (чӑв. Ӳсӗр водитель) рейда утӑ уйӑхӗн 14-16-мӗшӗсенче ирттернӗ. Мероприятие волонтёрсемпе общественниксем хутшӑннӑ. Республикӑн аякри районӗсене ҫул-йӗр патруль службин уйрӑм ятарлӑ батальонне янӑ.
Рейд вӑхӑтӗнче хӗрӗнкӗ 63 водителе тытса чарнӑ. Вӗсен транспортне ятарлӑ стоянкӑна ӑсатнӑ.
Тытса чарнӑ водительсенчен 40 ытларахӑшӗн е водитель прави пулман, е вӗсен правине унчечн туртса илнӗ. Ҫул ҫитмен 7 ҫамрӑк та усӗрле руль умне ларнӑ. Сӑмахран, утӑ уйӑхӗн 16-мӗшӗнче 23 сехет те 30 минутра Йӗпреҫ районӗнче 16 ҫамрӑк мопедпа пынӑ. Хӑйӗн прави те пулман, ҫитменнине тата ӳсӗр пулнӑ.
Улатӑр, Элӗк, Вӑрнар, Йӗпреҫ, Пӑрачкав, Ҫӗмӗрле, Тӑвай районӗсенче наркӑмӑшлӑ пултӑранпа кӗрешессин пӗрремӗш тапхӑрне вӗҫленӗ. Ял хуҫалӑх министрӗ Сергей Артамонов каланӑ тӑрӑх, кӑҫал ҫак ӳсен-тӑранпа кӗрешме 20,9 миллион тенкӗ уйӑрнӑ.
Кӑҫал наркӑмӑшлӑ пултӑран ӳсекен вырӑн пӗлтӗрхинчен 1,1 хут пысӑкланнӑ. Вӑл ытларах Тӑвай, Йӗпреҫ, Куславкка районӗсенче ӳснине палӑртнӑ.
Наркӑмӑшлӑ пултӑрана юпа уйӑхӗн 1-мӗшӗччен пӗтерме тӗллев лартнӑ.
Шупашкарта ҫывӑх вӑхӑтра (01.05.2024 15:00) тӗтреллӗ ҫанталӑк, атмосфера пусӑмӗ 752 - 754 мм, 9 - 11 градус ӑшӑ пулӗ, ҫил 4-6 м/ҫ хӑвӑртлӑхпа ҫурҫӗр-хӗвеланӑҫ енчен вӗрӗ.
| Ҫемен Элкер, чӑваш сӑвӑҫи, ҫыравҫи ҫуралнӑ. | ||
| Шорникова Елена Васильевна, чӑваш актриси ҫуралнӑ. | ||
| Сергеев Алексей Сергеевич, чӑваш актёрӗ, тава тивӗҫлӗ культура ӗҫченӗ ҫут тӗнчерен уйрӑлса кайнӑ. | ||
Пулӑм хуш... |